„ავკარგიანობა გიორგი სააკაძისა“ (ჩვენი ეროვნული გმირი თუ ქართველი ალკიბიადე?!)

აღწერა

გიორგი სააკაძის ღვაწლის გაგება-შეფასების მცდელობანი ქართულ ისტორიოგრაფიასა და, საერთოდ, საზოგადოებრივ აზროვნებაში, საუკუნეების მანძილზე არ დამცხრალა. პირიქით, უკანასკნელ ათწლეულებში გამძაფრდა კიდეც. თითქოს, ერთი შეხედვით, საკითხის გაგება არცთუ ისე ძნელია, მაგრამ მოხდა ამბავი, რამაც გამორიცხა მისი გააზრების ნორმალური განვითარება. საქმეში ჩაერია ერთ დროს დიდად აღზევებული „ხალხთა ბელადი“ იოსებ სტალინი, რომელსაც თავი დიდ ისტორიკოსადაც მიაჩნდა. საბჭოური წესწყობილების ტოტალიტარული ხასიათიდან გამომდინარე, მისეული „ნასიბრძნის“ დიდ უარყოფით ზეგავლენას ვერ ასცდა ქართული ისტორიოგრაფიაც. და ეს სამწუხარო ვითარება დღემდე გრძელდება.